2025 жылғы 16 қазанда Астана қаласында «ICert» Халықаралық сертификаттау орталығы Қазақстанда алғаш рет көппәтерлі тұрғын үйлерді басқарушыларға кәсіби сертификаттарды салтанатты түрде табыстау рәсімін өткізді

ICert — Қазақстанда көппәтерлі тұрғын үйлерді басқару саласында ГОСТ ISO/IEC 17024-2014 халықаралық стандартының талаптарына сәйкес Ұлттық аккредиттеу орталығынан ресми аккредиттелген алғашқы персоналды сертификаттау органы болып табылады. Аккредитация орталықтың қызметі халықаралық талаптарға толық сәйкес келетінін растайды және мамандардың құзыреттілігін бағалау рәсімдерінің ашықтығын, объективтілігін және тәуелсіздігін қамтамасыз етеді.

Сертификаттарды салтанатты түрде табыстау рәсімі ҚР Өнеркәсіп және құрылыс министрлігі, «ҚазЦентр ТКШ» АҚ, сондай-ақ сала ұйымдары мен тұрғын үй-коммуналдық шаруашылық саласының сарапшыларының қатысуымен өтті. 

Іс-шараның маңыздылығы 2025 жылғы 15 қыркүйектен бастап күшіне енген «Тұрғын үй қатынастары туралы» Қазақстан Республикасының Заңына енгізілген өзгерістермен айқындалды (3-параграф, 51-4-бап, 3-тармақ). Аталған нормаға сәйкес, кондоминиум нысанын басқару субъектілері өз құрамында кәсіби біліктілігі мойындалған және «Кәсіби біліктіліктер туралы» Заң мен тиісті кәсіби стандарттарға сәйкес басқару функцияларын орындай алатын қызметкерлер болған жағдайда ғана басқару қызметтерін көрсетуге құқылы.

Табысталған сертификаттар — аккредиттелген орган арқылы тәуелсіз бағалаудан өткен, көппәтерлі тұрғын үйлерді басқарушылардың кәсіби біліктілігін ресми түрде растайтын Қазақстандағы алғашқы құжаттар болып табылады.

Сонымен қатар, рәсім барысында адами ресурстарды басқару және жобалық менеджмент салаларындағы мамандарға да сертификаттар берілді. Осы бағыттардағы мемлекеттік қызметшілер де қолданыстағы нормативтік-құқықтық актілерге сәйкес кәсіби біліктілігін растау мақсатында сертификаттаудан өтуге міндетті.

ICert алдағы уақытта мемлекеттік органдармен, салалық қауымдастықтармен және сарапшылар қауымдастығымен бірлесе отырып, Қазақстан Республикасындағы ұлттық сертификаттау жүйесін дамытуға және мамандардың кәсіби деңгейін арттыруға үлес қосуды жалғастырады.

instagram: